Ministri i Jashtëm grek, Papandreu ka kërcënuar Shqipërinë me destabilizim.Këtë deklaratë kërcënuese ministri i Jashtëm i Greqisë e ka bërë gjatë një interviste dhënë për gazetën më të madhe greke, "Ta Nea". Sipas Papandreut, "në rast se nuk do të tretet ëndra e shqiptarëve për një Shqipëri të madhe, atëhere Shqipëria do të destabilizohet."Paralajmërimi grek bëhet në një kohë kur Shqipëria është e interesuar më shumë se kurrë për stabilitet politik dhe ekonomik dhe në një kohë që vendi po përgatitet të përmbushë kushtet e vendosura nga komuniteti ndërkombëtar për të përfituar ndihmat në kuadër të paktit të stabilitetit për Ballkanin.

Përfundimi i luftës në Kosovë ka bërë që klasa politike shqiptare në tërësi të jetë shumë më e përgjegjshme në hapat e saj në krahasim me disa muaj apo vite më parë. Kështu PD forca më e madhe e opozitës në vend ka vendosur hyrjen në parlament, pas një viti braktisje, në kushtet e reja të krijuara dhe për të dhënë kontributin e saj në kalimin e problemeve madhore me të cilat po ndeshet vendi, që janë ndërtimi i një shteti ligjor, lufta ndaj kriminalitetit në rritje si dhe ndaj fenomenit më negativ të këtyre kohëve të fundit që është korrupsioni. Por Greqia duket e frikësuar nga perspektiva Shqipërisë dhe integrimi i saj në strukturat europiane. Paralajmërimi kërcënues i ministrit të Jashtëm grek është shoqëruar gjithashtu edhe me veprime të tjera që shkojnë për llogari të destabilizimit të Shqipërisë. Kështu vetëm dy ditë pas deklaratës së bërë nga ana e Papandreut, një shoqatë enigmatike në jug të vendit nën emërtesën "shoqatë e biznesmenëve të minoritetit" ka "denoncuar" shkeljen e të drejtave të njeriut nga ana e autoriteteve shqiptare ndaj biznesmenëve minoritarë si dhe i ka kërkuar OSBE-së dhe organizmave europianë që të ndërhyjnë për të mbrojtur minoritetin grek në Shqipëri. Një deklaratë kjo e çuditshme dhe që në thelb synon nxitjen e konflikteve artificiale mes një përqindje të vogël të minoritet grek, që banon në jug të vendit dhe pjesës tjetër të shqiptarëve. Madje pjesa më madhe e kësaj pakice është larguar prej vitesh nga Shqipëria

Po kështu ish-kryetari i PS, Nano i akuzuar nga deputeti socialist Pëllumbi si agjent në politikën shqiptare ka nisur një fushatë të ashpër me mitingje në të gjithë territorin e vendit në kërkim të postit të humbur të kryetarit të partisë. Zv.kryeministri socialist Meta gjatë një interviste është shprehur se fushata e Nanos po synon destabilizimin e vendit. Nano njihet në politikën shqiptare si mbrojtës i interesave të lobeve të ndryshme greke.

Po nga Greqia ditët e fundit ka nisur një operacion i egër duke dëbuar dhe keqtrajtuar emigrantët shqiptarë që punojnë në Greqi. Derisa tani numërohen mbi 12 mijë emigrantë të dëbuar nga Greqia si dhe mbi 2 mijë të keqtrajtuar nga autoritet policore greke.

Fushata antishqiptare ka nisur në Greqi që me fillimin e luftës në Kosovë, por tashmë me mbarimin e luftës në Kosovë ajo po intensifikohet edhe më shumë. Emigrantët shqiptarë thonë se ndonëse shumica prej tyre me dokumenta të rregullta, ata kapen nga autoritetet greke dhe mbahen për dy ose tre ditë nëpër stadiume ku lihen pa bukë dhe ujë dhe më pas sillen në kufirin me Shqipërinë. Greqia ndonëse një vend anëtar i NATO-s, gjatë gjithë fushatës së kësaj aleance mbi Serbinë ka mbajtur një qëndrim të hapur në favor të Serbisë, gjë e cila është demonstruar me mitingje të shumta proteste kundër NATO-s dhe në favor të Millosheviçit.

Deklarata e Papandreut për destabilizim të Shqipërisë ka ngjallur një reagim të ashpër në shtypin opozitar shqiptar. Shumë prej analistëve në Shqipëri, deklarata të tilla u kujtojnë rolin që Greqia ka luajtur në destabilizimin e Shqipërisë dy vite më parë në pranverën e '97, kur edhe një divizion grek arriti të shkelë sovranitetin e Shqipërisë për afro 24 orë dhe u largua prej jugut të Shqipërisë vetëm pas reagimit të ashpër dhe të menjëhershëm të komunitetit ndërkombëtar dhe në mënyrë të veçantë të Shteteve të Bashkuara të Amerikës dhe Turqisë, të cilat paralajmëruan Greqinë për këtë veprim.

Kërcënimi grek për destabilizim të Shqipërisë po komentohet edhe si një përplasje mes interesave ekonomike të Greqisë me ato të komunitetit ndërkombëtar në Shqipëri dhe në rajon. Greqia është e interesuar për ndërtimin e korridorit të dhjetë, një korridor që kalon nga veriu i Greqisë në Shqipëri, Mal të Zi dhe vazhdon në Trieste të Italisë.Por vende të fuqishme të komunitetit ndërkombëtar si Shtetet e Bashkuara dhe vende të tjera evropiane janë më të interesuara që në Shqipëri projekti më i afërt të jetë ai i korridorit të tetë, i përkrahur edhe nga Presidenti i Shteteve të Bashkuara Bill Klinton gjatë një fjalimi.

Ky korridor kalon nga Stambolli, në Sofje, Shkup dhe përfundon në Durrës të Shqipërisë. Ky korridor edhe nga Shqipëria vlerësohet si prioriteti kryesor që do të ndihmojë zhvillimin e shpejtë të vendit. Por ndërtimi i një korridori të tillë e lë Greqinë në periferinë e planeve të rindërtimit të Ballkanit pasi nuk kalon nga ky vend dhe pozita e saj nuk mund të jetë më aq e privilegjuar sa më parë.

Ndaj Greqia duket se përballë këtyre planeve të komunitetit ndërkombëtar ka zgjedhur rrugën për t'iu imponuar këtij komuniteti me tezën e destabilizimit të Shqipërisë, një gjë që ia ka arritur ta realizojë dy vite më parë, por që në kushtet e reja duket gjithmonë dhe më e vështirë për tu përsëritur, për vetë faktin se NATO ka vendosur një kontigjent prej të paktën pesë mijë trupash në Shqipëri, të cilat nuk mund të lejojnë në asnjë mënyrë destabilizimin e Shqipërisë, pasi një gjë e tillë do të ishte me pasoja për të gjithë Ballkanin.