Serbët
e Kosovës dhe lufta për pushtet në Serbi:
VOZHDËT E RI, SITUATA E RE, POLITIKA E VJETËR
Shkruan:
Xhafer SHATRI
Në
fund të gushtit, krejt papritur u bë sërish i gjallë
vozhdi i dikurshëm i serbëve të Kosovës, Mirosllav
Sholleviç. Në mediat serbe ai caktoi dhe një datë
për kthimin masiv të serbëve në Kosovë.
Dhe data ishte 21 shtatori, dita kur vera i lëshon radhën
vjeshtës. Sipas Sholeviçit rreth 110 mijë serbë
pritej të bllokonin 11 pika kufitare që hyjnë në
Kosovë: shtatë në kufirin Serbi-Kosovë dhe nga
një në kufinjtë me mes Kosovës e Malit të
Zi gjegjësisht Maqedonisë. Bllokimi do të kishte
3 faza: më 21 e 22 shtator kufiri do të bllokohej nga
gjashtë orë si paralajmërim për UNMIK-un që
t'ua mundësojë kthimin serbëve në Kosovë,
duke u siguruar njëherit shtëpi, duke i kthyer në
vendet e punës dhe duke ua kompensuar dëmest që kanë
pësuar gjatë dhe pas bombardimeve të Natos.
Nëse
UNMIK-u nuk do t'i merrte parasysh këto paralajmërime,
atëherë do të fillonte faza përmbytëse
e kufirit, bllokimi i plotë dhe i pakusht gjersa UNMIK-u të
zbatonte urdhërat e "Këshilli për kthimin e
serbëve të përndjekur dhe pasardhësve të
tyre në Kosovë e Metohi që prej 6 prillit 1941 e
deri më sot!"
Serbët "paqësorë, por me përjashtime"
Sipas
Sholeviçit, Këshillin për kthimin e serbëve
dhe pasardhësve të tyre, e përbëjnë, krahas
tij, akademiku Svetomir Arsiç Basara, dr. Sreten Martinoviç,
Rato Çvoroviç dhe Marijana Bruder. Sholeviç
na siguron se aksioni "Duam të kthehemi në shtëpi"
është "300% paqësor", por pranon se në
mesin e tyre "aty-këtu ka përkrahës të
opcionit të armatosur".
Sipas
mediave serbe, Këshilli i ka dërguar në fillim të
këtij muaji një letër presidentit amerikan, Xhorxh
Bush, Këshillit të Sigurimit të OKB-së dhe ambasadave
të Fuqive të Mëdha në Beograd. Në letër
thuhet se bashkësia ndërkombëtare s'paska bërë
gjë fare për serbët në Kosovë. "Përderisa,
nën mbikqyrjen ndërkombëtare, u kthyen për tri
javë disa qindra mijëra shqiptarë në Kosovë,
ndërkaq edhe pse kanë kaluar tri vjet UNMIK-u nuk po e
bën këtë edhe për 300 mijë serbë të
ndjekur (!) nga Kosova më 1999", thuhet.
Në
një kumtesë të Këshillit thuhet: "Ne, serbëve
të Kosovës dhe Metohisë po na ndjekin nga votrat
tona prej 62 vjetësh e këtej, nga Hitleri deri te Klintoni.
U bënë katër vjet nga përndjekja gjenocidale
e verës së vitti 1999 dhe askush nuk del të na ndihmojë.
Shpresat tona për t'u kthyer dolën të kota."
Më
9 shtator, të njëjtën ide e shpërfaqi përmes
mediave edhe Nebojsha Çoviç, nënkryetar i qeverisë
së Serbisë dhe kryetar i Qendrës Koordinuese për
Kosovën dhe Metohinë. Ai akuzon rëndë UNMIK-un
për mos ndërmarrjen e masave adekuate për kthimin
e serbëve në Kosovë.
Në
këtë vijë, më 13 shator 2002 në Shtëpinë
e kulturës në Graçanicë, u mbajt mbledhja
e Shoqatës "Spas" (Shpëtimi), në të
cilën u vendos të dilet hapur me idenë për copëtimin
e Kosovës. Kryetar i kësaj shoqate, Sllavisha Kostiç,
që njëherit na qenkesh edhe "kryetari i pjesës
serbe të komunës së Prishtinës" deklaroi
se kjo nismë duhet të arsyetohet me faktin se është
e pamundur bashkëjetesa e serbëve me shqiptarët,
prandaj: "Ta shpëtojmë atë që mund të
shpëtohet, ta bëjmë atë që duhet ta bëjmë!"
Kush janë liderët e ri/vjetër të ekstremistëve
serbë?
Në
një intervistë M. Sholleviç thotë se "ne
do kërkojmë nga Shtajneri, që në të gjitha
qytetet e Kosovës të kthehen serbët dhe, sipas shembullit
të Mitrovicës, të ketë lagje të veçanta
për serbë, ku ata do të jetonin krejt ndaras nga
shqiptarët."
Ndërkaq
Çoviçi deklaronte se "
ne do ta përcjellim
situatën. Nuk do të intervenojmë as me polici as
me ushtri, por në rast të incidenteve në kufirin
administrativ do të intervenojmë." (Beta, 19. 09.02)
Organizimi
i aksionit për Kthimin e Madh u fry aq shumë në mediat
serbe sa që, më 19 shtator e detyroi shefin e UNMIK-ut
M. Shtajner te deklaroi se: "Ideja për kthim masiv është
cinike dhe keqpërdorim i njerëzve të zhvendosur.
Nuk është e ndershme që t'i ftosh njerëzit të
kthehen dhe në anën tjetër të mos kesh mundësi
t'u garantosh siguri dhe kushte të tjera për jetesë
"
Shihej
ashiqare se ndërkombëtarët nuk e kishin kuptuar lojën,
në të cilën Sholleviçi - njësoj si dhe
në vitet tetëdhjetë! - s'ish gjë tjetër
pos xhoker mjeran i qarqeve më ultranacionaliste të Beogradit.
Marshi duhej mbajtur në valën e fushatës elektorale
dhe si mbështetje direkte e Koshtunicës! Dy ditë
më vonë, një nga organizatorët e këtij
takimi, Çoviçi, deklaroi publikisht se në garën
presidenciale partia e tij do ta mbështeste Koshtunicën,
pra jo të zgjedhurin e Xhinxhiçit, Llabushin!
Ky
fakt nxjerr në pah se aksionin "Hoçemo kuçi",
e ka organizuar Nebojsha Çoviç me porosi të Koshtunicës,
e në funksion të shfrytëzimit të problemeve
të serbëve të Kosovës për çështje
elektorale. Njësoj si dikur në vitet tetëdhjetë,
Sholeviç me "mitingashët" e tij besnikë
janë bërë pjesë e rëndësishme në
luftën për pushtet që bëhet në Beograd.
"Marshi i Madh" - "Malo Morgen"!
Në
një takim të mbajtur më 20 shtator nga Çoviçi
dhe Odbori i Sholjeviçit në hotelin "Zvezda"
në Vrnjaçka Banja, u vendos që të hiqet dorë
nga marshi "Duam të kthehemi në shtëpi"!
Gjoja kjo ujdi u arrit pas një debati të nxehtë pesorësh.
Për
këtë anulim u gjetën një arsyetim falso, e një
real: se gjoja paskesh "informata të sigurta" se
terroristët shqiptarë po përgatisin aksione kundër
pjesëmarrësve të marshit! Dhe ajo kryuesorja, se
Xhinxhiçi (kundër të cilit, pra, ish dizajnuar
tërë ky lëmsh që në krye) gjoja paskësh
takuar fshehurazi Shtajnerin, duke e anashkaluar zyrtarin e Koshtunicës,
Nebojsha Çoviçin! E meqë "tradhëtarit"
Xhinxhiç iu çor maska, piuni Sholleviç, oficeri
Çoviç dhe mbreti Koshtunica vendosin, pra, bashkarisht
ta shtyjnë "Marshin e Madh" për "Malo Morgen".
Ndonëse
caku kryesor i riaktivizimit të oficerëve të vjetër
të Millosheviçit në Kosovë mbetet, pra, në
fushën e politikës së brendshem serbe, kjo s'do të
thotë se Kosova s'kërcënohet nga pasojat e hileve
në Beograd. Për Kosovën është me rëndësi
madhori fakti se koordinator i politikave serbe kundrejt Kosovës
mbetet besniku i Koshtunicës nacionalist, Nebojsha Çoviçi.
Zgjedhjet
komunale kosovare do të mbahen më 26 tetor, e pjesëmarja
e serbëve të Kosovës në to po kushtëzohet
me koncesione konkrete që po quhet decentralizim. Faza tjetër
në strategjinë e Koshtunicës është, natyrisht,
copëtimi i Kosovës. Ai këtë e kërkonte
qysh në kohën e Millosheviçit, e ka vazhduar ta
mbështesë si opcion edhe gjatë presidencës së
vet. S'është, pra, aspak e rastit pse më 23 shtator
Çoviçi u takua me Shtajnerin në Prishtinë
për ta biseduar këtë çështje. Në
një intervistë dhënë gazetës "Danas",
eskponentja e Çoviçit në parlamentin kosovar,
Rada Trajkoviç, thotë: "ne i kemi marrë të
gjitha masat për përgatitjen e zgjedhjeve, por kjo nuk
do të thotë se ne do të marrim pjesë në
to. Nuk ka pjesëmarrje veresie. Nëse nuk fitojmë
diçka konkrete, ne do t'i bojkotojmë zgjedhjet tërësisht."
Pra,
dy të vrame me një të rame. Të mbështetet
fushata elektorale nacionalisti "të moderuar",Vojisllav
Koshtunica, e njëherit të bëhet trysni mbi UNMIK-un
për të lëshuar pe edhe më tej para kërkesave
serbe, deri në copëtimin de jure të Kosovës.
|