INTELEKTUALI
NË POLITIKË
Droj se duke u nisur nga qëllimet më të mira po bëj
gabime gjithnjë më të mëdha
Kryetari
çek, Vacllav Havel, ditë më parë ishte për
vizitë zyrtare në SHBA. Në Universitetin e Nju-Jorkut,
në një sallë të mbyllur, ku ishin të pranishëm
miqtë e tij, mes tyre Bill Klinton dhe Eli Viesel, Haveli mbajti
një fjalim lamtumirës (në shkurt të vitit të
ardhshëm atij i skadon definitivisht mandati presidencial),
ku u përpoq të shpjegojë dilemat e veta. Ishte ky
një rrëfim filozofik mahnitës që të përkthyer
po e publikojmë për lexuesit e Pasqyrës.
"Falënderoj
Elin (Viesel) dhe Billin (Klintonin) për fjalët e bukura.
Falënderoj të gjithë të pranishmit për
pjesëmarrjen. E ruaj të freskët në kujtesë
koncertin me të cilin Njujorku më pati përshëndetur
më 1990, në cilësinë e kryetarit çekosllovak.
Natyrisht se nuk nderohesha vetëm unë si individ. Përmes
meje janë nderuar e përshendetur gjithë bashkëqytetarët
e mi, që arritën pa dhunë ta rrëzojnë regjimin
e përdhunshëm në vendin tonë, si dhe gjithë
të tjerët që, krahas meje apo bashkë me mua
në mënyrë të padhunshme iu kundërvunë
atij regjimi.
Shumë mendje të lira në botë në fitoren
e revolucionit të kadiftë çekosllovak kanë
parë lajmëtarin e shpresës së mirë për
një botë më njerëzore, ku fjala e poetëve
ndoshta do të kishte peshë poaq sa edhe fjala e bankierëve.
Në këtë takim, edhe pse miqësor e të këndshëm,
nuk mund të mos pyetem se gjatë këtyre 13 vjet pushteti
a kam ndryshuar, çka ka bërë me mua ky qëndrim
i gjatë e i pakuptueshëm në funksionin e kryetarit,
a më kanë ndryshuar dhe si ajo mori ngjarjesh të
një epoke me aq përthyemje? Dhe gjithnjë e më
tepër po bindem në një çështje të
habitshme: edhe pse është pritur që përvoja
e mbledhur do të më jepte më shumë vetëbesim,
më shumë menquri dhe suverenitet, e vërteta është
krejt ndryshe: gjatë kësaj kohe jam bërë më
i pasigurtë dhe më modest.
Ndoshta nuk do të më besoni, por unë në të
vërtetë për çdo ditë kam më tepër
drojë, gjithnjë e më shpesh po frikohem se këtë
ose atë nuk do të mund ta përballoj ose se do të
prish diçka, gjithnjë e më tepër po mundohem
duke shkruar fjalime, me ç'rast gjithnjë e më shumë
po tmerrohem nga pashpresa e vetëpërseritjes, gjithnjë
e më tepër po më kaplon droja se mos po i zhgënjej
ata që besojnë në mua, që ndokund po tregohem
jokompetent, se mos duke u nisur nga qëllimet më të
mira po bëj gabime gjithnjë e më të mëdha,
se mos po nuk po jam sa duhet i besueshëm dhe mos po humb të
drejtën të bëj atë që po bëj
Dhe përderisa presidentët më të rinj i gëzohen
çdo rasti të takohen me njëri-tjetrin ose me njerëz
të tjerë poashtu të rëndësishëm, ose
të paraqiten në televizion ose të mbajnë fjalim
dikund, unë kësaj po i frikohem gjithnjë e më
tepër, ashtu si edhe asaj që do të duhej ta pranoj
si shansë, po rrudhem nga frika gati iracionale se atë
shansë ashtu ose kështu do ta humb dhe kështu çështjen
e përgjithshme do ta dëmtoj. Shkurt, gjithnjë e më
tepër jam spekptik.
Dhe sa më shumë po shtohet numri i armiqve, unë edhe
më shumë po kaloj në anën e tyre, duke u bërë
de fakto armiku kryesor i vetëvetës. Si ta shpjegoj këtë
zhvillim vetanak krejt të pabesueshëm? Për këtë
do të mendoj më thellë kur të përfundojë
mandati im presidencial, kur do të mundem, qoftë dhe për
një moment të tërhiqem anash, ta kem njëfarë
distance nga politika dhe të filloj, sërish si njeri i
lirë, të shkruaj dhe diçka tjetër e jo vetëm
fjalime politike.
Tash për tash mund të ofroj vetëm njërin prej
shpjegimeve të mundshme të kësaj çështjeje:
me plakjen po pjekem, po fitoj përvojë dhe mend, po filloj
lirisht dhe me gjithë qenien të bëhem i vetëdijshëm
për shkallën e përgjegjësisë sime dhe tërësinë
shumëngjyrëshe të obligimeve që dalin nga detyrimi
që kam marrë.
Për më tepër, po vjen pandalë çasti i
pashmangshëm kur rrethi, bota dhe çka është
më së keqi ndërgjegjja ime, më pak me pyesin
çfarë idealesh kam dhe cilat i kam synimet, çka
dua të arrijë dhe si do ta ndryshoj botën, por fillojnë
të më pyesin çka kam arritur, çka kam përmbushur
nga synimet e mia, çfarë rezultatesh, çfarë
gjurmësh dhe çfarë bote po lë pas.Ky është
i njëjti shqetësim shpirti, i cili dikur me vite më
ka shtyer t'i kundërvihem regjimit totalitar dhe nuk më
ka lejuar të shkëputem prej saj, e i cili sot më
detyron të dyshoj thellë në rezultatet e punës
sime, si dhe të atyre që kam përkrahur ose veprimtarinë
e të cilëve e kam mundësuar.
Gjatë marrjes së titujve të ndryshëm të
doktorit të nderit, duke dëgjuar lavdatat e rastit, shpesh
kam qeshur në vete, sepse në ato lavdata unë dilja
gati si heroi i përrallave: si një djalë që
aq gjatë i ka rënë me kokë murit të kështjellës,
ku kanë sunduar mbretërit e këqinj, sa që muri
është rrënuar, ndërkaq ai është bërë
mbret dhe ka sunduar gjatë dhe mirë. Nuk dua të banalizoj,
të gjithë titujt që më janë dhënë
i çmoj, dhe gjithnjë kur të m'i japin unë
ndihem i lumtur, por po përmend këtë anën tjetër,
për mua komike të gjërave, sepse vetëm tash
po kuptoj se kurtha dreqnore e fatit që mua, që nga dita
në ditë më kanë kredhur në botën e
përrallave, po detyrohem të përplasem për toke
dhe të bindem gjithnjë se përrallat janë vetëm
stereotipe të ngurtësuara njerëzore dhe se bota kurrsesi
nuk ka strukturën e përrallave.
Dhe kështu, edhe pse nuk jam përpjekur të jem mbreti
i përrallave, edhe pse në këtë funksion jam
ndodhur gati me përdhunë dhe ngapak edhe si gabim i historisë
asgjë nuk më është falur gjatë zbritjes
së ngurtë nga përralla në tokë dhe nga
bota e festave revolucionare në botën e përditshmërisë
burokratike.
Që të mund të më kuptoni drejt: kurrsesi nuk
dua të them se jam mundur në ndeshjen time dhe se e tëra
është e humbur. Përkundrazi, bota jonë, njerëzimi,
civilizimi ynë, sot ndodhen në udhëkryqin më
të rëndësishëm të historisë dhe kanë
mundësi me shumë se asnjëherë tjetër ta
kuptojnë gjendjen e tyre dhe dykuptimësinë e orientimit
të vet dhe të vendosin për rrugën e arsyes,
të paqes dhe të drejtësisë. Theksoj vetëm
një gjë: të shkosh kësaj rruge nënkupton
shumë punë e të rëndë, sakrifica, durim,
arsimim, vetëkontroll, pajtim me rrezikun e moskuptimit, si
dhe çdonjëri që do të duhej të masë
forcën e vet dhe të llogaris se me detyrat e tij të
reja a do të rritet apo do të dobësohet forca e tij.
Shkurt, nuk mund të mbështetemi më tej në përralla
dhe në heronjtë e tyre. Eshtë e pamundur të
mbështetemi në gabimet e historisë me të cilat
poetët shpjegojnë rrënimin e perandorive dhe pakteve
ushtarake. Duhet, natyrisht, të përdëgjohet vëmendshëm
zëri i tyre paralajmërues, ndoshta më shumë
se zëri i bankierëve dhe i bursës, por është
e pamundur të mbështetesh në atë qe bota, nëse
është zënë me dorën e poetit, gjithsesi
do të kthehet në këngë.
Sido që të jetë, megjithatë për një
gjë jam krejt i sigurt: pavarësisht se si e kam kryer
detyrën që më është besuar, pavarësisht
nëse e kam dashur ose merituar, pavarësisht nga ajo se
nuk jam aspak i kënaqur me atë që kam bërë,
funksionin tim si president e marrë si një dhuratë
të madhe të fatit. Megjithatë kam pasur mundësi
të marr pjesë në ndryshime vërtetë historike
dhe me përmasa të përbotshme. Dhe ajo mundësi
është- si përvojë jetësore dhe mundësi
krijuese-kompenzim për të gjitha kurthet që ka fshehur
në vete.
Ndërsa tash më lejoni që të largohem definitivisht
nga vetja si qenie fizike dhe të përpiqem të formuloj
tri çështje apo pikëpamje të miat që
i kam vërtetuar gjatë qenies në botën e politikës
së lartë.
1.
Në qoftë se njerëzimi dëshiron të mbijetojë
dhe të evitojë katastrofat e reja, i gjithë rendi
botëror duhet të jetë i lidhur me një respekt
të sinqertë reciprok të qarqeve të ndryshme
të civilizimeve, të kulturave të popujve dhe të
kontinenteve dhe në përpjekjet e tyre të sinqerta
të kërkojnë dhe të gjejnë vlerat dhe moralin
e domosdoshëm, që u është i përbashkët
dhe të pajtohen në themelet e bashkëjetimit në
këtë botë të lidhur globale.
2.
Të keqes duhet kundërvënë që në fillesë
të saj, nëse nuk bën ndryshe, atëherë edhe
me forcë. Armatimi inteligjent dhe shumë i shtrenjtë
mund të mbrojë popullsinë civile. Nëse nuk ndodhë
kështu, atëherë miliardët e investuar janë
harxhuar kot.
3.
Nëse i vrojtojmë problemet e botës së sotme,
qofshin ekonomike, sociale, ekologjike ose përgjithësisht
të civilizimit, ne do të përballemi me pyetjen se
sa kjo ose ajo është e moralshme, se sa diçka nga
pikëvështrimi planetar është e përgjegjshme.
Rendi moral dhe burimet e tij, të drejtat e njeriut dhe burimet
e të drejtës së njeriut për t'u respektuar të
drejtat e tij, përgjegjësia e njerëzve dhe e kaluara
e saj, ndërgjegjja e njerëzve dhe rishqyrtimi i saj, para
këtyre asgjë nuk mund të fshehet me një rrjet
fjalësh patetike, këto, për bindjen time më
të thellë dhe sipas përvojës sime janë
temat më të rëndësishme politike të kohës
sonë. Kur shoh para vetës aq njerëz të famshëm,
të cilët sikur kanë rënë nga qielli me
yje, nuk mund t'i ik ndjenjës së rënies së gjatë
nga përralla në tokën e fortë dhe shpejtas kthehem
në përrallë. Dallimi ndoshta është vetëm
një: tash këtë nderim mund ta çmojë më
shumë se sa kam qenë i aftë për këtë
këtu e 13 vjet më parë
"
|