VIT
I RI, TELASHE TË REJA
Shkruan: Shqiptar
OSEKU
Ndërsa posta e ngadaltë kosovare ende s'i ka shkëmbyer
të gjitha kartolinat me urime të Vitit të Ri, në
horizontin e kësaj province që ka mbetur as në qiell
as në tokë vërehen telashe të reja.
Burimi i tyre është, ku tjetër, te politikanët
shqiptarë. Për ta arsyetuar mungesën e tyre nga sofra
e ngushtë e vendimmarrjes, ku po shihet qartë se ulen
sall Shtajneri e Çoviçi, ata kanë zënë
t'i fusin në pe disa rruaza krejt palidhje - porse rruaza që
Kosovës rrezikojnë t'i dalin dardhë me bisht.
Merreni p.sh. këtë nismën - që nismë i
thënçin! - të Kryetarit të Kosovës, z.
Ibrahim Rugova, që t'i bëhet kumbar hymnit e flamurit
të shtetit të palindur të Kosovës. Peshku prishet
në kokë së pari, ashtu edhe politika. Në këtë
nënqiell zor që është parë ndonjëherë
një gaf si ky i fundit i Rugovës: e kjo s'është
pak, kur kihet parasysh se Ballkani është nëna, e
Rugova babai i gafeve.
E para e punës, burri i botës duket se ka harruar që
për t'u bërë kumbar duhet së pari të të
lind fëmija. E dyta, kryetar a jo kryetar, kjo puna e hymnit
dhe flamurit në demokraci e ka njëfarë rendi: merreni
me mend se çfarë ideshë rreth shtetit paska Rugova,
kur s'i pyetka kah i kanë dajtë as qeverinë, as parlamentin,
e lëre më popullin e thjeshtë, për çështje
jetike si një hymn e një flamur: po për cikërrime
tjera, si do t'i vejë halli!? Dhe, e treta me rend po absolutisht
jo me rëndësi, edhe kumbara më i keq e di që
një foshnje jetime është kafshata e dreqit: e me
çka do të bëjnë pazar për shtetësinë
shqiptarët e varfër nesër pasnesër, kur t'ua
ketë hedhur Rugova badihava hymnin e flamurin shqiptar në
plehra?
Mua s'më habit ambicja e sëmurë e Rugovës, meqë
ai ka dëshmuar sa e sa herë, ashtu qesh-e-vesh butësisht
prapa syzeve të trasha e shallit xhentëlmen, se s'përton
të shkelë mbi kufoma për ta ruajtur bajrakun: pa
kujtoni një çikë "zgjedhjet demokratike"
të 1998-s, eliminimin e të burgosurve në kuvendin
e mëhershëm të LDK-së, ose lëmshin e pafije
në këtë të fundit. Ajo që më habit,
jo po më tmerron, është fryma normale me të
cilën është pranuar në shoqëri ky demonstrim
flagrant i reflekseve të tij autokratike.
Një tjetër xhevahir i politikës shqiptare, që
na polli këtyre ditëve, është "shpresa"
zyrtare e Tiranës për nisje të negociatave me BE
shi këtë gjysmëvjetor, kur kryesinë e radhës
e merr, po pra ia qëlluat: Greqia.
Se ç'i shtyn zyrtarët e shtetit shqiptar të shohin
lëshojnë si lopa baglat, këtë s'e di asnjeri.
Athua mos e paskan pasur smirë Shqipërinë danezët,
që e kishin kryesinë e BE-së gjatë vjeshtës
e dimrit, e ia bënë për inat? Apo besojnë në
Tiranë se te grekërit, si ballkanas që janë,
gjëllijnë pasione më të ngrohta për Shqipërinë?
(E drejta, mundet që po, por unë personalisht s'do të
doja të bëhem dëshmitar okular i plotësimit
të pasioneve të tyre... pa inat ndaj homoseksualëve,
por mënyra greke e dashurisë është e përmendur
në Evropë.)
Në histori përmendet mesazhi i kancelarit mesjetar Aksel
Oksenshterna, që ia dërgoi të birit me të dëgjuar
se ky paskësh kërkuar shërbim si kalorës në
oborrin e mbretit suedez: "Biri im, rri te shtëpia. Sikur
ta dije ti se me sa pak urti udhëhiqet kjo botë, do të
vrapoje i përlotur në palët e fustanit të jot
ëme".
Më ka rënë shpesh të mendoj në këtë
thënie, e më së shpeshti kur i kam parë bëmat
e gjëmat e politikanëve shqiptarë. Do të doja
ta jap një kumt më të mirë, një në
kajde të urimit të Vitit të Ri a të ngjashme,
në këtë thyerje motmotesh.
Mjerisht, e vetmja që mund të uroj është, se
ky vit 2003 do t'i ngjajë bukur fort atij të mbrapshtit
që sapo iku. Madje ky ka potencial të bëhet edhe
më i mbrapsht; se më i mbarë jo se jo - dita e mirë
shihet në mëngjes.
I vetmi ngushëllim është se s'i di të gjitha
detajet, po vetëm ato që mund t'i shoh nga perspektiva
ime. Ndryshe, ka rrezik që do ta nisja këtë vit duke
vrapuar i përlotur te palët e fustanit të mamasë.
|