Maratona popullore qeveritare maqedone
Sot nisi maratona popullore më masive maqedonase. Drejt Sobranie-s, Kuvendit maqedon, janë turrur 3060 persona, 153 subjekte elektoralë, 53 parti, 7 koalicione, 5 Grupe Qytetare.
Pas shpine mbeti fushata më e çmendur elektorale maqedone dhe një nga fushtat më të çmendura që ka parë Ballkani. Me bomba, kryqe metalikë 76 metërsh, vrasje, nota diplomatike, rrëmbime, asfaltime rrugësh katundi, tanksa, hard rock, helikopterë. Aq e turbullt, saqë deri fushatat e rrokopujshme shqiptare gati-gati të japin përshtypjen e fushatave europiane.

Për "ujkun e vjetër" të zgjedhjeve, Edward Joseph-in e "Grupit Ndërkombëtar të Krizave", "Çdo gjë që ndodh në kontekstin e zgjedhjeve, ka "background" të qartë politik". "Organizata e Brendshme Revolucionare Maqedone (VMRO) kërkoj që të përmirësojë përqindjen e ulët nëpërmjet turbullirave. Kalkulimi i saj i rrezikshëm ishte se në kohë të shqetësuara, pozicionet radikale sigurojnë më shumë vota" thonë nën zë, por njëzëri, vrojtuesit ndërkombëtarë.

Ish Ministri i Brendshëm Pavle Trajanov i sqaron edhe më mirë këto thënie: "VMRO-ja ka një trupë sulmi qëllimi i së cilës është provokimi i shqiptarëve duke krijuar kështu një alibi për ti shpëtuar kritikës ndërkombëtare për ndërhyrjen pasuese me trupa ushtarake".
Merita që ky "kalkulim i rezikshëm" nuk solli rinisjen e luftës, i takon palës shqiptare. Sipas Këshilltarit të Presidentit Trajkovski, ish Ministrit të Jashtëm Frckovski, "Shumë politikanë shqiptarë kanë treguar ate maturi politike që i ka munguar partive maqedone. Merita për këtë zhvillim tek Shqiptarët i takon Ali Ahmetit".

Në gusht CIA e kishte lajmëruar Ahmetin se 200 "luanër" të Ministrisë së Brendshme, të veshur civilë ishin pregatitur për tu përgjakur me zgjedhësit e tij dhe Ahmeti u tërhoq nga tubimi. Edhe pardje Ahmeti anulloi tubimin e fundit elektoral. "E bëmë që të mos përmbyset i gjithë procesi paqësor... dhe nga ndjenja e përgjegjësisë për jetën e qytetarëve" tha ai. "Ahmeti ka mjaft autoritet nacional që të dalë me pikepamje te arsyeshme, pa frike se do të akuzohet se nuk është patriot shqiptar" tha Crvenkovskii SDSM-së. "Kjo e ngriti lart në sytë e Bashkësisë Ndërkombëtare" vijoi komentet media e huaj. "Kur Ministri i Brendshëm Boshkovski kërkoi të arrestonte Ahmetin, amerikanët, të paktën siç thotë Boshkovski, ju kërcënuan se do ta nisin pako postale drejt e në gjyqin e kriminelëve të luftës në Hagë".
Njollat e murme

"VMNRO-ja i beson vetëm një sondazhi opinioni, zgjedhjeve" tha kryetari i VMNRO-së Georgievski pasi pa ngjyrën e murme të sondazheve për partinë e tij. Nëse në zgjedhjet e shkuara VMRO-ja kishte dy herë më shumë vende në parlament -së se shemra Aleanca Social Demokrate Maqedonase (SDSM), sot situata paraqitet e pëmbysur. Sipas sondazheve dhe opinionit unanim, SDSM-ja do të ketë 1,5 herë më shumë vota se VMRO-ja.

Kjo përmbysje nuk i përket vetëm kampit maqedon., BDI-ja e Ahmetit parashikohet të marrë dy herë vota më shumë sesa ortakja qeveritare e VMRO-së, Partia Demokratike Shqiptare (PDSH) e Xhaferit.
Sipas sondazheve të Institutit për Demokraci dhe Shoqëri Civile në korik SDSM kishte 30,2% ndërsa VMRO 13,6%, dhe një javë para SDSM-ja kishte 36,7 % dhe VMRO-ja 21,6 %. Sipas këtij sondazhi BDI e Ahmetit merr 10,7% të votave dhe PDSH 3,9%. Por kjo e dhënë bazohet në formulën maqedone një shqiptar tre maqedonë. Po të nisemi nga formula shqiptare dy maqedonë një shqiptar, përqindja duhet të jetë më e lartë. Jo pak vrojtues i japin BDI-së vendin e dytë.

Sido që të jetë, inversioni është i qartë: Dy partitë e koalicionit në pushtet i kanë humbur vendet e para, VMRO-ja si parti maqedone dhe PDSH-ja si parti shqiptare.

Të dy humbësit e mëdhenj VMRO dhe PDSH kanë zgjedhur të njëjtën taktikë humbëse. Të dy fituesit e mëdhenj SDSM-ja dhe BDI-ja kanë zgjedhur të njëjtën taktikë fituese.

"PDSH-ja ka marrë, së paku verbalisht, flamurin radikal në palën shqiptare, ndërsa VMRO-ja këtë e bën në palën maqedonase. E si për çudi këtyre dy partive koalicioni me njera tjetren u funksionon mrekullisht" habitet Crvenkovski i SDSM-së. Vërtet aksioma thotë ekstremet puqen, por jo në këtë masë. Nuk mund të ketë psh. koalicion nazisto-zionist.

Dhurata e krishtlindjeve
"Nëse dikush do të pyeste maqedonasin e thjeshtë, çfarë dëshëron si dhuratë nga viti i ri? Ai do të përgjigjej të rijetoja në kohën mirë të Maqedonisë komuniste" tallet Spiegel-i gjerman. Dmth. "përpara në të shkuarën". Por në të vëertetë politikani më i preferuar është Kiro Gligorovi. Ministrin agresiv dhe qesharak të policisë Boshkovski, e pëlqen veç 4% e maqedonsave, mesa duket policët.
Maqedonia është e lodhur nga luftërat pa kuptim për hir të një ideali të pakuptimtë nacionalist të VMRO-së, Maqedonia është e lodhur nga triket me lepuj që dalin nga kapelja e VMRO-së, e rrënuar ekonomikisht nga lufta e pakuptimtë civile e VMRO-së. Vota maqedone është së pari një votë proteste.
Por nëse si kryetari Georgievski i VMRO-së, si nënkryetari Menduh Thaçi i PDSH-së, i cili po e zëvëndëson gjithnjë e më tepër Xhaferin e sëmurë, janë ndër politikanët më të zgjuar të Ballkanit, zgjedhja e kësaj taktike nuk ka ndodhur për shkaqe paaftësie ose verbërie. Si VMRO-ja ashtu edhe PDSH-ja ishin të detyruara që të zgjidhnin taktikën që zgjodhën.

Slogani kryesor i VMRO-së, të cilën qarqet diplomatike e njohin me emrin "enfant terrible", fëmijë i tmerrshëm, dmth. rugaç, është "Luftë banditit Ahmeti". Madje ajo i propozoi edhe SDSM-së një koalicion për të luftuar "gangsterin Ahmeti". Ndërkohë që SDSM-ja e qesëndisi ajo e ktheu këtë slogan në "Luftë banditit Ahmeti dhe tradhëtarëve që bashkëpunojnë me te".
Kjo do të thotë se VMRO-ja është në kërkim të një gozhde ku mund të varë sërishmi pushtetin, të një lufte të ethshme për të mos dalë nga pushteti. "Ka frikë të tmerrshme nga dhënia llogari pas zgjedhjeve" thonë Liberal-Demokratët. Sipas raportit fare të freskët të "Grupit Ndërkombëtar të Krizave", të 14 gushtit, "Korrupsioni në Maqedoni ka evoluar nga forma pasive në aktive. Kapaciteti i tij tashmë pengon plotësisht zhvillimin ekonomik... Kupola e korrupsionit eshte shteti, i cili e ka kthyer Maqedoninë në burim dhe pikë tranziti kontrabande dhe krimi të organizuar... Korupsioni i jep administrativës shtetërore pushtet të pakufishëm".
"Tema e re e cila imponohet - krimi i organizuar dhe korru
psioni, që nuk janë të pranishme vetëm te maqedonasit, por edhe te shqiptaret, rikthejne në lojë temen e marrdhënieve ndëretnike, pasi nuk kane per çfarë të flasin tjeter" thotë Crvenkovski. Sipas raporteve të fshehta, kryeqendra e kontrabandës së duhanit Kumanovo i përket Georgievskit dhe sipas ish Ministrit të Brendshëm Trajanov "prijës i transportit të duhanit është Menduh Thaçi".

Kjo dhe është arsyeja përse viktima Nr.1 e policisë ishte pikërisht BDI-ja e Ahmetit. Po aq, ndërsa të tërë akuzojnë për huliganizmat elektorale VMRO-në, i vetmi që akuzon për prishje mitingu "gangsterët e Crvenkovskit" është Menduh Thaçi. Në këtë kontekst, votat që i hiqen BDI-së së Ahmetit dhe i kalojnë PDSH-së së Xhaferrit janë vota për koalicionin VMRO-PDSH, dmth. vota për VMRO-në.
Paradoksi Shqiptar

Këtu nis paradoksi , këtë herë shqiptar. Nëse do arrestohet Ahmeti, PDSH-ja nuk do marrë pjesë në zgjedhje, por nuk do të dalë nga koalicioni thotë enigmatikisht Menduh Thaçi. Por ajo që të bije në sy është gjuha tepër e moderuar e partive shqiptare kundër partive shqiptare. Krejt e kundërt me gjuhën e partive maqedone kundër partive maqedone. Dhe, nëse vërtet përqindja e popullsisë shqiptare në Maqedoni është mbi 30% dhe nëse tërë partitë shqiptare do të bashkoheshin pas zgjedhjeve në një paketë të vetme, me BDI, PDSH, Parti Prosperiteti Demokratik (PDP) dhe Parti Demokratike Kombëtare (PDK), kjo paketë do të ishte më e madhe se çdo parti tjetër maqedone. Ajo do të mund të rrëzonte lehtë partinë e parë maqedone dhe të sillte në fuqi partinë e dytë, ndoshta edhe të tretë maqedone.

"Zgjedhjet parlamentare të 15 shtatorit do të sjellin ndryshime politike radikale si ato në Serbi në vitin 2000" thotë Këshilltari i Presidentit Frckovski "Lidershipi i sotëm i Kryeministrit Georgievski është shumë nervoz dhe shpejt do ta gjejë veten jashtë zyrës" vijon ai. Kjo do të zhdukte një nga vatrat ballkanike të infeksionit dhe koha është tamam kur kjo vatër duhet zhdukur. Bullgarët sapo kanë nisur të ndërtojnë naftësjellësin Burgas-Vlorë duke e devijuar për në Greqi. Shkaku thonë ata është situata maqedone. Dhe, nëse Maqedonia qetësohet, ky arter mund të dalë sërishmi në Vlorë duke i sjellë prosperitet ekonomik Maqedonisë dhe Shqipërisë.

Gazeta «Shekulli»