Shkruan: Skerdi SIKA

”A do të votosh në zgjedhjet e ardhshme?”, e pyeta një bashkatdhetar, dashamir të moçëm timin, para ca ditësh. ”Jo përzote, politika s’më intereson”, - ma ktheu ai.

Shqiptarellë shoqi, s’ia rroku as pahiri se mos ka gjë të bëjë edhe me atë politika!

E pra, dashamiri im s’është i vetmi me procesor të ngadalshëm. Janë bukur do si ai këtu, disa me dekada, që s’u ka kallëzuar hala kush se janë me banim permanent në Kosovë. Se jeta këtu ndërron bukur fort varësisht se kush është në krye të këtij vendi. E se kjo punë varet pak edhe prej tyre, të paktën çdo katër vjet.

Shqiptarellat, siç e di secili shqiptar, kanë llojlloj formati. Ka aso që s’dijnë dhe pranojnë që s’dijnë (mund të bëhen uppgrade). Ka që s’dijnë e as duan të dijnë (u vje koha, mos u mërzitni). Por ka edhe tipa të avancuar, që s’dijnë e shtihen se dijnë - ata janë të rrezikshëm! Te këta të fundit, grupi më destruktiv janë Patriotat, që ta mëshojnë hu kokës me argumentin ”Atdheu, bla-bla-blaha, Atdheu”. Këta janë ata që marrin pamje të lënduar të fytyrës, e ta krisin flakë: ”Po a pak halle tjera kemi ne shqiptarët a, që të merremi edhe me politikë a?!”, - zakonisht pasuar me me ofshama prekëse, që duhet t’i tregojnë rrethit se ti qenke tamam idiot jubilar.

Natyrisht, sikur të mos ishin shqiptarella, ata do të qitnin në kandar që parashkolloret e shkollat e fëmijëve, vendet e punës, rrugët, sigurimet sociale, xhaxhi doktori e teto infermierja, se sa e si do të jenë varet prej asaj se kush qeveris. E Patriotat do të kuptonin se Atdheu ka nevojë për miq jashtë, se për Kosovë e shqiptari ka dallim nëse komunat e Kosovës qeverisen prej LDK-së, a prej bllokut aktivist!

Ngushëllimi i vetëm gjysmak në këtë mes është, se për t’u kualifikuar si shqiptarellë me të drejta të plota kërkohet stazh i gjatë, shpesh herë jetësor.

Shqiptarella, thjeshtë, s’ta bën për inat por e ka zanat.

Ne tjerët, që s’jemi shqiptarella, kemi zënë ta vrasim kokën qysh tashti se për kë do të votojmë. Shtatori po avitet, e me të edhe momenti i të vërtetës.

Për anëtarët e komunitetit që s’e dinë ende nëse janë shqiptarë apo shqiptarella, redaksia e revistës e ka përgatitur një test psikologjik. Pjesëmarrja është vullnetare dhe anonime - redaksia ju bën be në Zotin që të mos na i dërgoni rezultatet!

Vetëm rrumbullakësoni alternativën që e shprehë më së miri bindjen tuaj. Fat të mbarë, e mos bëni hile!

Ç’ndodhë në Kosovë në shtator 2002
1. Mbaron vera? 2. Vje vjeshta? 3. Ka zgjedhje parlamentar e lokale
Ç’rend shoqëror ka Kosova
1. Hmmm… a bën edhe një herë…? 2. Paj… rend fort të mirë 3. Demokraci të kufizuar
Për çka votohet në shtator 2002
1. Kallëzomë, se të kallëzoj! 2. Se a do të lejohet vjeshta, apo jo 3. Për qeveri lokale
Sa parti parlamentare janë momentalisht në Kosovë
1. A mund të numëroj me gishta? 2. Janë bukur disa 3. Janë 14
Kush është kryetari, e kush kryeministri aktual
1. E kam zorin e nevojës… 2. Një me shall, dhe një i thinjur 3. Ibrahim Rugova, LDK Bajram Rexhepi, PDK
Cila parti parlamentare kërkon bashkim kombëtar
1. A bën me përkthyes? 2. Paska kërkuar dikush, a!? 3. Asnjë për be!

Rezultati:
Nëse ke ndonjë (1.) ose më shumë se një (2.) - je shqiptarellë klasik. Kërko ndihmë profesionale!