MBI
VEPRIMTARINË E FEHMI AGANIT
Shkruan
Rexhep ISMAJLI
Sot
është e natyrshme të pyesim: cila është
trashëgimia krijuese dhe mendore që na la prapa Fehmi
Agani? Pa qenë në gjendje të jap përgjigje me
vlerë, po jap këtu disa shënime, gjithë duke
ditur se do të vijnë të tjerë për ti
ndriçuar çështjet.
Duke pasë studiuar për filozofi, specializizuar në
shkencat sociologjike dhe politike, doktoruar në këto
shkenca, F. Agani, pas një përvoje si arsimtar i filozofisë
dhe i lëndëve të afërta në shkollat e mesme
të Prishtinës, kishte vazhduar si gazetar dhe komentator
i politikës së jashtme në gazetën Rilindja,
për tiu kthyer sërish arsimit - tani në rrafshin
universitar si ligjërues, docent e profesor i sociologjisë
dhe i sociologjisë politike, po edhe i lëndëve të
afërta me to, duke u bërë njëherësh dhe
themelues i Degës së Filozofisë e Sociologjisë
në Universitetin e Prishtinës, po edhe një nga ndërtuesit
kryesorë të Universitetit në tërësi.
Veprimtarinë e frytshme prej arsimtari universitar Fehmiu e
kishte nisur para Plenumit të Brioneve, që shënoi
kthesë në zhvillimet politike në ish-Jugosllavi dhe
sidomos në Kosovë. Pikërisht në atë kohë
të çlirimit të energjive krijuese të shqiptarëve
shquhet roli i grupit të intelektualëve që përpiqeshin
që ato energji ti kanalizonin në drejtime pozitive.
Fehmiu ishte ndër ata që shquheshin posaçërisht
qoftë sa i përket angazhimit për demaskimin e shtypjes
barbare të ushtruar mbi shqiptarët, qoftë edhe më
shumë në kërkimin e hapësirave të reja
për zgjerimin e të drejtave shoqërore dhe kombëtare
të shqiptarëve me synim barazimin me të tjerët
në ish-Jugosllavi. Gjurmët e angazhimit të tij hetohen
në disa drejtime:
1.
Në drejtimin politik - në kërkimin e rrugëve
për përparim institucional të këtyre të
drejtave, krijimin e klimës politike dhe pastaj edhe të
kërkesave juridike-kushtetuese për avancimin e statusit
të Kosovës në kuadër të federatës
jugosllave. Dhe pikërisht në ato vite (1967) artikulohet
nëpër mbledhje kërkesa për krijimin e Republikës
së Kosovës të barabartë me republikat e tjera
të Jugosllavisë. Fehmiu ishte ndër ata që jo
vetëm e mbështetën këtë kërkesë,
por e argumentuan dhe e ushqyen me tërë fuqinë e
mendjes e të dijeve që kishin mbledhur në jetën
e tyre. Për brezin të cilit i takoj unë Fehmiu dhe
2-3 shokët e tij vlenin për njerëzit që e ushqenin
vazhdimisht idenë e Republikës së Kosovës, ashtu
siç ushqehet një krijesë e vetja. Është
e qartë se në lëvizje të tilla ata nuk kanë
mundur të jenë të ndarë nga realitetet politiko-shoqërore.
Besoj se shumë shpejt do të dalin raste dhe njerëz
të tjerë për të folur me saktësi për
këto gjëra. Mendohet, porse, që pas demonstratave
të vitit 1968, pikërisht për arsye si ato që
u përmendën më sipër ndër të parët
në thumb të sulmeve prej arsimtarëve të Universitetit
u gjet Fehmiu.
2.
Një prej rezultateve të lëvizjes së atëhershme
ishte se Kosova objektivisht rrëmbeu një hapësirë
politike brenda së cilës të drejtat e popullatës
së saj dhe të drejtat e shqiptarëve duhej të
ngriheshin në një nivel tjetër dhe kjo hapësirë
mund të bëhej reale nëse mbushej me zhvillimin e
veprimtarive instiutcionale, politike, administrative, kulturore,
shkencore e të tjera. Në të gjitha këto drejtime
të veprimit Fehmi Aganin e gjejmë diku në radhët
e më shpesh në ballë. Dhe në të gjitha
ato veprimtari, jo vetëm për brezin tonë, po edhe
për shumë para nesh, reagimi i Fehmiut dhe i disa prej
shokëve të tij kishte rëndësi jo vetëm
për efektet që krijonte tek institucionet politike e administrative,
po në radhë të parë për rolin e reperit,
të pikës orientuese për sjelljen e të tjerëve
në rrethanat kur informimi dhe çdogjë tjetër
ishte e dirigjuar.
3.
Në ndërtimin e mëtejmë të rrjetit të
shkollave të larta dhe të fakulteteve, për të
kaluar në organizim universitar me mësim të plotë
në gjuhën shqipe. Ne që kemi marrë pjesë
si studentë në jetën e fakulteteve në ato vite
e mbajmë mend mirë luftën prej luani që bënte
ai për çdo vend pune, për çdo orë mësimi
shqip, për çdo të drejtë specializimi të
të rinjve në qendra të tjetra. Është e
sigurt se angazhimi i tij ashtu me tërë qenien dhe mendjen
arrinte të mobilizonte të gjitha energjitë që
ndodheshin në fakultet atëherë për të hapur
rrugën dhe për të arritur më shpejt synimin
themelor: të ndërtohej rrjeti i fakulteteve deri në
shkallën e nevojshme për themelimin e universitetit të
pavarur nga Universiteti i Beogradit dhe njëherësh për
mbushjen e tërë hapësirës me mësim në
gjuhën shqipe.
4.
Në themelimin dhe ngritjen e institucioneve shkencore. Më
1967 Fehmi Agani qe emëruar drejtor i Institutit të sapothemeluar
Albanologjik në Prishtinë (Instituti Albanologjik ishte
themeluar më 1953 dhe ishte mbyllur më 1955). Tani çdogjë
duhej të fillonte nga e para.
5.
Në angazhimin për hapjen e komunikimit të shqiptarëve
të ish-Jugosllavisë me shqiptarët e tjerë, posaçërisht
me Shqipërinë. Fehmi Agani ka luajtur një rol të
dorës së parë në kërkimin dhe gjetjen e
rrugëve jo shumë të lehta në rrethanat e atëhershme
politike për komunikim midis shqiptarëve ngado që
të jenë. Nuk mund të harrohen ndihmesat dhe angazhimet
e tij të guximshme për organizimin e kontakteve shkencore-kulturore
me instancat përkatëse të Shqipërisë. Është
posaçërisht me rëndësi të theksohet këmbëngulja
e tij në gjetjen e formave dhe në krijimin e rrethanave
për integrime shqiptare, çka nuk ishte gjë krejt
e lehtë, jo vetëm për shkak të qëndrimeve
antishqiptare të shumëkujt në Jugosllavi, po edhe
për shkak të hezitimeve, apo bindjeve që ishin krijuar
ose po krijoheshin edhe ndër shqiptarë në anë
të ndryshme të kufirit. Si sukses me vlerë posaçërisht
të madhe simbolike, po edhe konkrete, mund të konsiderohet
nxitja dhe organizimi i Konsultës Gjuhësore të Prishtinës
të vitit 1968, që u mbajt me organizim të Instiutit
Albanologjik dhe të Katedrës së Gjuhës Shqipe
të Fakultetit Filozofik, e që në mënyrë
konkrete dhe faktike e legalizoi vendimin për një gjuhë
të vetme letrare për të gjithë shqiptarët.
Ky ishte hapi më i madh konkret që ishte bërë
në drejtim të integrimeve shqiptare. Në diskutimet
dhe nxitjet krejtësisht pa imponim të Fehmiut binin në
sy qysh atëherë dhe në kontrast me mentalitetin dhe
ideologjitë sunduese ndër ne kërkesat që shtronte
ai për procese demokratizimi, poaq sa për unitetin e kulturës
kombëtare pavarësisht nga ndarjet dhe kufijt.
6.
Në situatën e re të Kosovës në federatën
jugosllave, pas Amendamenteve kushtetuese dhe Kushtetutës së
vitit 1974 Fehmiut dhe një numri gjithsesi të vogël
intelektualësh shqiptarë u binte barra e shpjegimit dhe
e mbrojtjes së interesave, të kauzës shqiptare, duke
kërkuar hapësira të reja, sidomos në raport
me botën shqiptare dhe botën tjetër. Në vargun
e angazhimeve të tilla që kërkonin dhe shumë
guxim intelektual e tjetër mund të përmendet angazhimi
i tij vendimtar për pengimin e laurimit të krijuesit të
projekteve gjenocidale kundër shqiptarëve akademik Vaso
Çubriuloviqit me çmimin e AVNOJ-it. Si për ironi,
më vonë kjo kërkesë e shovinistëve serbë
u realizua pikërisht në kohën kur në krye të
Jugosllavisë ishte një shqiptar.
7.
Pas themelimit të Universitetit të Prishtinës dhe
krijimit të një rrjeti minimal të institucioneve
themelore shkencore Fehmiu dhe grupi i intelektualëve që
kishin merita të posaçme në këtë drejtim
veprimtarinë e tyre e përqëndruan në rritjen
e infrastrukturës së brendshme të këtyre institucioneve
dhe të cilësisë e gjerësisë së punës
brenda tyre, çka reflektohej drejtpërsëdrejti në
rritjen dhe përhapjen e nevojave dhe të kërkesave
për pavarësim, për akumulimin e argumentimit të
pabarazisë së gjendjes ekzistuese, pra edhe për krijimin
e vetëdijes për nevojën e ndryshimit të gjendjes.
Pas Demonstratave të vitit 1981 në institucionet e Universitetit
Fehmi Agani shquhet me argumentimet kundër vlerësimeve
zyrtare jugosllave për karakterin e Demonstratave dhe kundër
represionit policor-ushtarak mbi studentët dhe rininë.
Angazhimet e tilla ishin baza për ndëshkimin që i
dha pushteti partiako-policor duke e larguar nga mësimi dhe
duke e mbajtur në vështrim të përhershëm
policor.
8.
Në fillim të viteve ´90 Fehmiu është në
kreun e lëvizjes së madhe politike për pavarësinë
e Kosovës, në udhëheqjen e ngushtë të LDK-së
(nënkryetar dhe kreator i shumë ideve dhe nxitës
i proceseve larg përtej suazave të LDK-së), në
manifestimet e ndryshme dhe sidomos në kontaktet intensive
me gazetarë dhe diplomatë të huaj tërësisht
të dhënë pas shpjegimit, argumentimit të arsyeve
për pavarësinë e Kosovës dhe pas krijimit të
lidhjeve e të miqësive që do ta ndihmonin këtë
proces. Eshtë e çuditshme ku e gjente gjithë atë
energji që edhe pas të gjitha këtyre të arrinte
të merrej deri në detaje me projektimin, organizimin dhe
efektuimin e kësaj lëvizjeje, duke lënë kështu
gjurmë të pashlyeshme. Eshtë poashtu e çuditshme
aftësia e tij krejtësisht e rrallë që përkrye
të gjithave të mbante kontakte jashtëzakonisht të
gjera me njerëz dhe shtresa nga më të ndryshmet.
9.
Në hartimin e të gjitha dokumenteve të rëndësishme
për lëvizjen politike në Kosovë në dekadën
e fundit, sidomos në hartimin e atyre dokumenteve që kanë
peshë dhe vlerë ndërkombëtare, etj.
10.
Në ndërtimin dhe selitjen e raporteve sa më të
afërta midis grupeve dhe partive në Kosovën e viteve
90, etj.
Me
një fjalë, veprimtaria intensive në kuadër të
proceseve shoqërore gjithnjë në vorbullin kryesor
dhe shumë shpesh në prijë të proceseve mori
një pjesë të madhe të energjive krijuese të
Fehmi Aganit për 4 dekada me radhë.
Veprimtaria
e shkruar
Si
njeri që ka pasur privilegjin ta njihte nga afër mënyrën
e punës të Fehmiut dhe që është në
situatë të shohë tash në mënyrë rekapitulative
gjithë çka lënë Fehmiu në veprimtarinë
e tij të gjerë intelektuale të shkruar, të botuar
ose jo, pa pretendime për të bërë klasifikime
valide, mund të them se ai ka lënë prapa një
vepër të rëndësishme intelektuale-shkencore
në fusha me interes të veçantë për ne
si shkencat shoqërore në përgjithësi, sociologjia,
sociologjia politike dhe filozofia e politikës në veçanti.
Përkrye angazhimeve tejet të mëdha dhe shterruese
që u përmendën më sipër, arrinte gjithnjë
të shkruante dhe të botonte studime, diskutime dhe ndërhyrje
me vlerë. Dhe nuk mund të mos vihet në pah harmonia
midis veprimeve të tij shoqërore-politike dhe bindjeve
e ideve që dalin nga studimet dhe mendimtaria e tij.
Nga ato që kam arritur të shoh deri tash rezulton se përqëndrimet
kryesore të Fehmi Aganit në veprimtarinë e tij të
gjatë intelektuale e shkencore mund të paraqiten kronologjikisht
si vijon:
-
Nga fillimet e deri në fund të jetës së tij
është konstante vija e angazhimit intelektual me shkrime
dhe tekste serioze në drejtim të argumentimit të
qenësisë njësore etniko-shoqërore shqiptare
përtej ndarjeve të padrejta shtetërore, duke theksuar
sidomos mëvetësinë dhe veçantinë e shoqërisë
shqiptare në konturat shtetërore-shoqërore jugosllave,
për të kaluar te shquarja e idesë për realizimin
konkret të kësaj mëvetësie si pavarësi
e plotë. Në këtë fushë Fehmiu ka lënë
shumë shkrime me cilësi të lartë intelektuale
dhe ato mund të përbëjnë ndoshta dy vëllime
të përmbledhura.
Paralelisht me shkrimet që kanë impakt të drejtpërdrejtë
në jetën tonë shoqërore, në vitet ´60
Fehmiu ka shkruar një bllok studimesh me vlerë sociologjiko-politike
për proceset e participimit të punëtorëve në
drejtimet e ndërmarrjeve (Mitbestimmung) në Gjermani.
Ato studime, që përbëjnë një tërësi
dhe vëllim më vete, janë botuar serbokroatisht nëpër
revista shkencore të atëhershme dhe janë vlerësuar
nga specialistët.
Nga viti 1967 e tëhu bie në sy përqëndrimi i
Fehmiut në veprimtarinë hulumtuese-shkencore për
proceset shoqërore-politike në Shqipëri gjatë
Luftës II Botërore, sidomos në studimin e veprimtarisë
së partive politike. Në këtë kohë ai kishte
hartuar disertacionin e doktoratës për Partitë dhe
grupet politike në Shqipëri gjatë Luftës II
Botërore, që përbën një monografi të
gjerë dhe shumë serioze si për hulumtimin kompleks
politik e sociologjik, ashtu dhe për guximin intelektual, shkencor
e politik për të folur publikisht për ato probleme.
Pas vitit 1970 mbisundojnë shkrime më ngushtësisht
sociologjiko-teorike, përfshirë dhe tekste për nevoja
të shkollave, të hartuara qoftë vetëm, qoftë
bashkë me autorë të tjerë.
Në vitet ´80, sidomos pasi iu mohua e drejta e mësimdhënies
më 1983, Fehmi Agani ishte përqëndruar në projektin
e rëndësishëm të studimit të historisë
së mendimit sociologjik. Rezultat i pjesërishëm i
kësaj pune është libri me vlerë të posaçme
dhe gjithnjë i vetëm i atij lloji ndër ne Në
rrjedha të mendimit sociologjik i botuar më 1990.
Në vitet ´90 interesimet intelektuale dhe shkrimet e
Fehmiut përqëndrohen në dy trasa kryesore: në
argumentimet dhe shpjegimet serioze politike të të drejtave
shqiptare dhe të Kosovës në raport me sllavët
e jugut përreth, në projektimet e lëvizjeve konkrete
politike përbrenda shoqërisë sonë, në projektimet
dhe argumentimet e pavarësisë shtetërore dhe shtetformuese
të Kosovës dhe në mbrojtjen dhe përhapjen e
këtyre ideve; ana tjetër dhe gati paralele me këtë
ka të bëjë me çështjet e organizimit
të jetës shoqërore, përgjithësisht me organizimin
e shoqërisë civile dhe me proceset e demokratizimit. Prodhimi
intelektual i Fehmiut në këto dy fusha mund të përmblidhet
në më shumë se dy vëllime serioze.
Në vitet ´80 Fehmiu ka shpenzuar energji intelektuale
dhe krijuese në ndihmë të mekanizmave shoqërorë
shqiptarë për tu mbrojtur nga sulmet dhe shtrembërimet
e kampanjës antishqiptare të drejtuar nga qarqet policore.
Në këtë fushë ndër dorëshkrime kam
gjetur gati në tërësi librin rreth 200 faqesh të
hartuar për nevoja të instancave shqiptare.
Polemikat e ndryshme me karakter shoqëror, ku spikat nervi
i tij për të hetuar problemet por pa e prekur personalitetin
e atij me të cilin polemizonte, të hartuara qoftë
shqip qoftë serbisht, pikërisht pse janë të
tilla dhe shpjegojnë çështje, ashtu si dhe për
disa veçori stili, mund të përbëjnë një
vëllim të veçantë.
Trajtim më vete dhe në vëllim të veçantë
duan intervistat e Fehmi Aganit për shtypin dhe mediumet shqiptare,
të ish-Jugosllavisë dhe ndërkombëtare të
periudhës 1990-1999, në të cilat poashtu vend qëndror
zënë çështjet që lidhen me proceset shoqërore
dhe politike ndër shqiptarë dhe në Ballkan, çështja
madhore e pavarësimit të Kosovës, rrugët e ndërtimit
të shtetit të pavarur, etj.
Një vlerë më vete paraqesin përkthimet që
ka bërë Fehmi Agani në fushat e sociologjisë
dhe të filozofisë, duke dhënë kështu një
ndihmesë të shquar në krijimin dhe në stabilizimin
e termino-logjisë, po edhe në fokusimin e vëmendjes
së opinionit në këto fusha.
Prodhimtaria shkencore-intelektuale e Fehmi Aganit është
shkruar për pjesën më të madhe në gjuhën
shqipe. Për një pjesë ajo është hartuar
serbisht, por ka dhe shkrime që janë ruajtur në përkthim
anglisht. Edhe vetë kam qenë i habitur kur dorëshkrimin
e tezës së tij të doktoratës e gjeta të
hartuar në dy gjuhë - shqip dhe serbisht. Një prej
miqve të tij, që i njihte më mirë rrethanat
në vitet ´70, më shpjegoi se ai kishte qenë
i shtrënguar të vepronte ashtu për shkak të
temës dhe të fushës në të cilën po
punonte dhe të rrethanave komplekse në të cilat po
mbrohej disertacioni.
Në
gjendjen që është trashëgimia shkencore, mendimore
dhe publicistike e Fehmi Aganit dalin të ne-vojshme dhe të
ngutshme disa veprime. As në Akademi e as gjetiu, për
fat të keq, deri tash nuk kam gjetur një bibliografi të
përgjithshme dhe të përdorshme për botimet e
tij. Mbledhja dhe sistemimi i shkrimeve të tij është
detyra e parë që shtrohet para atyre që duan të
merren me këtë vepër në mënyrë të
organizuar. Me tej del e nevojshme të hulumtohet nëpër
materialet që i kanë shpëtuar luftës dhe të
rindërtohen dorëshkrimet eventuale, apo të zbardhen
fragmentet, copat, idetë dhe skicat me të cilat ishte
gjithnjë plot kjo kokë e madhe jona.
E përmbledhur dhe e sitemuar veprimtaria e gjerë shkencore-intelektuale
e Fehmi Aganit do të jetë (in)formative edhe për
shumë kohë për lexuesin tonë. Përkrah gjallërisë
së tij të jashtëzakonshme në veprimtaritë
shoqërore, veprimtaria e tij shkrimore-shkencore-intelektuale
e thekson edhe më shumë përmasën e kthjellësisë
dhe të thellësisë së mendjes, shpirtin krijues,
në përgjithësi intelektualin e kalibrit krejtësisht
të veçantë në hapësirën shqiptare.
|